ವಿಡಿಯೋ ನೋಡಿ: ಬೈಕ್‌ ಗೆ ಶಾಟ್ಸ್‌ ಪಟಾಕಿ ಅಂಟಿಸಿ ಡೇಂಜರ್‌ ಸ್ಟಂಟ್‌

ಚೆನ್ನೈ: ಬೈಕ್ ಮೇಲೆ ಪಟಾಕಿ ಶಾಟ್‌ಗಳನ್ನು ಇರಿಸಿ ಸ್ಫೋಟಿಸುತ್ತಾ ಸ್ಟಂಟ್ ಮಾಡಿದ ಭಯಾನಕ ಹಾಗೂ ಅಪಾಯಕಾರಿ ವೀಡಿಯೋ ಜಾಲತಾಣದಲ್ಲಿ ವಿಡಿಯೋ ವೈರಲ್‌ ಆಗಿತ್ತು. ಇದೀಗ ಯುವಕರನ್ನು ಪೊಲೀಸರು ಕಂಬಿ ಹಿಂದೆ ಕೂರಿಸಿದ್ದಾರೆ.
ತಮಿಳುನಾಡಿನ ತಿರುಚಿರಪಲ್ಲಿಯಲ್ಲಿ ಈ ಘಟನೆ ನಡೆದಿದ್ದು, ಬಂಧಿತ 24 ವರ್ಷದ ಯುವಕನಾಗಿದ್ದಾನೆ. ತನ್ನ ದ್ವಿಚಕ್ರ ವಾಹನದ ಮುಂಭಾಗದಲ್ಲಿ ಶಾಟ್ಸ್‌ ಪಟಾಕಿಗಳನ್ನು (ನೆಲದಿಂದ ರಾಕೆಟ್‌ನಂತೆ ಆಕಾಶಕ್ಕೆ ಚಿಮ್ಮಿಅಲ್ಲಿ ಬೆಳಕಿನ ಚಿತ್ತಾರ ಮೂಡಿಸುವ ಶಾಟ್ಸ್‌) ಅಂಟಿಸಿ ಬಳಿಕ ಬೈಕ್‌ನ್ನು ಆಕಾಶಕ್ಕೆ ಮುಖ ಮಾಡಿ ವ್ಹೀಲಿಂಗ್ ಮಾಡುತ್ತಾ ಓಡಿಸಲು ಆರಂಭಿಸಿದ್ದಾನೆ. ಈ ವೇಳೆ ಬೈಕ್‌ನ ಚಲನೆಯಿಂದ ಬರುವ ಗಾಳಿಯಿಂದಾಗಿ ಈ ಪಟಾಕಿ ಶಾಟ್ಸ್‌ಗಳು ಈತನ ಮುಖದತ್ತ ಬರುವಂತೆ ಭಾಸವಾಗಿ ಬಳಿಕ ಮೇಲೆ ಆಕಾಶಕ್ಕೆ ಹಾರಿ ಸ್ಫೋಟಗೊಳ್ಳುತ್ತಿವೆ.

ತಮಿಳುನಾಡಿನ ತಿರುಚಿ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದ್ದು, ಯುವಕ ಈಗ ಪೊಲೀಸರ ಅತಿಥಿಯಾಗಿದ್ದಾನೆ. ಪೊಲೀಸರ ಪ್ರಕಾರ ಈತ ಸರ್ಮರುತುರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಈ ಬೆಂಕಿಯಾಟದ ಸಾಹಸ ಮಾಡಿದ್ದಾನೆ. ನವಂಬರ್ 9 ರಂದು ಈತ ತನ್ನ ಇನ್ಸ್ಟಾಗ್ರಾಮ್ ಖಾತೆ ಡೆವಿಲ್ ರೈಡರ್‌ನಲ್ಲಿ ಈ ವೀಡಿಯೋ ಅಪ್‌ಲೋಡ್ ಮಾಡಿದ್ದು, ಸ್ವಲ್ಪ ಹೊತ್ತಿನಲ್ಲೇ ಇದು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ. ಈತನಿಗೆ ಇನ್ಸ್ಟಾಗ್ರಾಮ್‌ನಲ್ಲಿ 71 ಸಾವಿರ ಫಾಲೋವರ್ಸ್‌ಗಳಿದ್ದಾರೆ.

ಇನ್ನು ಹೀಗೆ ಸ್ಟಂಟ್ ಮಾಡಿದ ಯುವಕನನ್ನು ತಂಜಾವೂರಿನ ನಿವಾಸಿ 24 ವರ್ಷದ ಅಜಯ್ ಎಂದು ಗುರುತಿಸಲಾಗಿದೆ. ಇನ್ನು ವೈರಲ್ ಆದ ಸ್ಟಂಟ್ ವೀಡಿಯೋದಲ್ಲಿ ತಮಿಳು ಸಿನಿಮಾ ಡೈಲಾಗ್ ಇದ್ದು, ಜೊತೆಗೆ ಹಿನ್ನೆಲೆ ಸಂಗೀತಾ ಹಾಗೂ ಪಟಾಕಿಗಳ ಸದ್ದಿದೆ. ಪಟಾಕಿಗಳನ್ನು ಬೈಕ್‌ನ ಚಕ್ರದ ಮೇಲ್ಭಾಗದ ಜಾಗದಲ್ಲಿ ಕಟ್ಟಿ ಬೆಂಕಿ ಕೊಟ್ಟು ಈತ ಅತೀ ವೇಗದಲ್ಲಿ ಬೈಕ್ ವ್ಹೀಲಿಂಗ್ ಮಾಡಿದ್ದನ್ನು ವೀಡಿಯೋದಲ್ಲಿ ಕಾಣಬಹುದಾಗಿದೆ.