By ಉಡುಪಿ: ಉಡುಪಿ ಜಿಲ್ಲೆಯಲ್ಲಿ ವಿಪರೀತ ಮಳೆಯಾಗುತ್ತಿದ್ದು, ತುಂಬಿ ಹರಿಯುತ್ತಿದ್ದ ತೋಡಿಗೆ ಬಿದ್ದು ವ್ಯಕ್ತಿಯೊಬ್ಬರು ಸಾವನ್ನಪ್ಪಿದ ಘಟನೆ ಕೋಟ ಠಾಣೆ ವ್ಯಾಪ್ತಿಯ ಹಳ್ಳಾಡಿ- ಹರ್ಕಾಡಿಯಲ್ಲಿ ನಡೆದಿದೆ.
ಸ್ಥಳೀಯ ನಿವಾಸಿ ಹೋಮ್‌ ಫುಡ್‌ ತಯಾರಕ ಗೋಕುಲ್‌ ದಾಸ್‌ ಪ್ರಭು (54) ಮೃತಪಟ್ಟವರು. ಅವರು ಮಂಗಳವಾರ ಬೆಳಗ್ಗೆ ದಿನಬಳಕೆ ಸಾಮಗ್ರಿ ತರಲು ಹರ್ಕಾಡಿ ಸಮೀಪದ ಮಕ್ಕಿಮನೆಗೆ ತೆರಳಿದ್ದು, ತುಂಬಾ ಸಮಯವಾದರೂ ಮನೆಗೆ ಮರಳಿರಲಿಲ್ಲ. ಹೀಗಾಗಿ ಅವರ ಪುತ್ರ ಹುಡುಕಿಕೊಂಡು ಹೋದಾಗ ಮಕ್ಕಿಮನೆಯ ಸಮೀಪ ತೋಡಿನಲ್ಲಿ ತಂದೆ ಬಿದ್ದಿರುವುದು ಗೊತ್ತಾಗಿದೆ. ಅಕ್ಕಪಕ್ಕದವರ ಸಹಾಯದಿಂದ ಮೇಲೆತ್ತಿ ತಂದು ನೋಡಿದಾಗ ಮೃತಪಟ್ಟಿರುವುದು ದೃಢಪಟ್ಟಿದೆ.
