ಬೆಂಗಳೂರು: ಇಸ್ರೋದ (ISRO) ಮಹತ್ವಾಕಾಂಕ್ಷೆಯ ಚಂದ್ರಯಾನ-3ರಲ್ಲಿ (Chandrayaan 3) ಚಂದ್ರನ ನೆಲದ ಮೇಲೆ ಓಡಾಟ ನಡೆಸುತ್ತಿರುವ ಪ್ರಗ್ಯಾನ್ ರೋವರ್ (Pragyan Rover)ಗೆ ಅಲ್ಲಲ್ಲಿ ಹೊಂಡಗಳನ್ನು ಸಿಗುತ್ತಿದ್ದು, ಇದನ್ನು ಪಾರು ಮಾಡಿಕೊಂಡು ಹೋಗುವುದು ಅದರ ಪಾಲಿಗೆ ಸವಾಲಿನ ಕೆಲಸವಾಗಿದೆ.
ಕೆಲ ದಿನಗಳ ಹಿಂದಷ್ಟೇ ದೊಡ್ಡ ಹೊಂಡವನ್ನು 3 ಮೀಟರ್ ದೂರದಿಂದಲೇ ಗುರುತಿಸಿ ಭೂಮಿಯ ನಿಯಂತ್ರಣ ಕೇಂದ್ರದ ಸೂಚನೆಯಂತೆ ಅದನ್ನು ತಪ್ಪಿಸಿಕೊಂಡು ಪಥ ಬದಲಿಸಿದ್ದ ಪ್ರಗ್ಯಾನ್, ಇದೀಗ ಚಂದಿರನ ನೆಲದಲ್ಲಿರುವ ಇನ್ನೊಂದು ಹೊಂಡವನ್ನು ತಪ್ಪಿಸಿಕೊಂಡು ಹೋಗುವ ಪ್ರಯತ್ನದಲ್ಲಿರುವ ವಿಡಿಯೋವನ್ನು ವಿಕ್ರಮ್ ಲ್ಯಾಂಡರ್ (Vikram Lander)ನಲ್ಲಿರುವ ಕೆಮರಾ ಇಸ್ರೋ ನಿಯಂತ್ರಣ ಕೇಂದ್ರಕ್ಕೆ ಕಳುಹಿಸಿಕೊಟ್ಟಿದೆ.
ಈ ವಿಡಿಯೋವನ್ನು ಇಸ್ರೋ ತನ್ನ ‘ಎಕ್ಸ್’ (X) (ಹಿಂದೆ ಟ್ವಿಟ್ಟರ್ ಎಂದು ಕರೆಯಲಾಗುತ್ತಿತ್ತು) ಖಾತೆಯಲ್ಲಿ ಪೋಸ್ಟ್ ಮಾಡಿದ್ದು ಅದಕ್ಕೊಂದು ಚಂದದ ಬರವನ್ನೂ ನೀಡಿದೆ.
‘ಸುರಕ್ಷಿತ ದಾರಿಯನ್ನು ಹುಡುಕುವ ಪ್ರಯತ್ನದಲ್ಲಿ ರೋವರ್ ರೊಟೇಟ್ ಆಗಿದೆ. ಈ ರೊಟೇಶನನ್ನು ಲ್ಯಾಂಡರ್ ಇಮೇಜರ್ ಕೆಮರಾ ಸೆರೆಹಿಡಿದಿದೆ’
‘ಚಂದಮಾಮನ ಅಂಗಳದಲ್ಲಿ ಮಗವೊಂದು ಖುಷಿಯಿಂದ ಆಡುತ್ತಿರುವಂತೆ ಮತ್ತು ಇದನ್ನು ತಾಯಿ ಮಮತೆಯಿಂದ ವೀಕ್ಷಿಸುತ್ತಿರುವಂತೆ ಅನ್ನಿಸುತ್ತಿದೆ.. ಅಲ್ಲವೇ..!?’ ಎಂದು ‘ಇಸ್ರೋ’ ಬರೆದುಕೊಂಡಿದೆ.
𝐂𝐡𝐚𝐧𝐝𝐫𝐚𝐲𝐚𝐚𝐧-𝟑 𝐌𝐢𝐬𝐬𝐢𝐨𝐧 𝐮𝐩𝐝𝐚𝐭𝐞:
The rover was rotated in search of a safe route. The rotation was captured by a Lander Imager Camera.
It feels as though a child is playfully frolicking in the yards of Chandamama, while the mother watches affectionately.… pic.twitter.com/PXxecmQEeG
— ISRO InSight (@ISROSight) August 31, 2023
ಇದೇ ವೇಳೆ ಚಂದಿರನ ನೆಲದಲ್ಲಿ ಸಲ್ಫರ್ ಇರುವಿಕೆಯನ್ನು ಪ್ರಗ್ಯಾನ್ ರೋವರ್ ನಲ್ಲಿರುವ ಇನ್ನೊಂದು ಉಪಕರಣ ಪತ್ತೆಹಚ್ಚಿದೆ ಎಂದು ಇಸ್ರೋ ಇಂದು (ಆ.31) ಖಚಿತಪಡಿಸಿದೆ.