ನವದೆಹಲಿ: ಅಂತಾರಾಷ್ಟ್ರೀಯ ಒಲಿಂಪಿಕ್ ಸಮಿತಿ (ಐಒಸಿ) ಒಲಿಂಪಿಕ್ಸ್ಗೆ ಕ್ರಿಕೆಟ್ ಸೇರಿಸಲು ಮಹತ್ವದ ನಿರ್ಧಾರ ಕೈಗೊಂಡಿದೆ. ಮುಂಬೈನಲ್ಲಿ ಸೋಮವಾರ ನಡೆದ ಐಒಸಿಯ 141ನೇ ಅಧಿವೇಶನದ ಸಭೆಯಲ್ಲಿ ಈ ನಿರ್ಧಾರವನ್ನು ಪ್ರಕಟಿಸಲಾಗಿದೆ. ಇದಾದ ಬಳಿಕ 2028ರಲ್ಲಿ ಲಾಸ್ ಏಂಜಲೀಸ್ ನಲ್ಲಿ ನಡೆಯಲಿರುವ ಒಲಿಂಪಿಕ್ಸ್ ನಲ್ಲಿ ಟಿ20 ಮಾದರಿಯಲ್ಲಿ ಕ್ರಿಕೆಟ್ ಪಂದ್ಯಗಳು ನಡೆಯಲಿವೆ. ಈ ಮೂಲಕ 128 ವರ್ಷಗಳ ನಂತರ ಒಲಿಂಪಿಕ್ಸ್ಗೆ ಕ್ರಿಕೆಟ್ ಮರಳಿದೆ.
ಅಕ್ಟೋಬರ್ 15 ರಿಂದ ಮುಂಬೈನಲ್ಲಿ ಐಒಸಿಯ 141 ನೇ ಅಧಿವೇಶನ ನಡೆಯುತ್ತಿದೆ. ಸಮಿತಿಯ ಈ ಸಭೆ ಅಕ್ಟೋಬರ್ 17 ರವರೆಗೆ ನಡೆಯಲಿದೆ. ಸಮಿತಿಯ ಈ ನಿರ್ಧಾರದ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ಐಒಸಿ ಸದಸ್ಯೆ ನೀತಾ ಅಂಬಾನಿ, ‘ಈ ನಿರ್ಧಾರ ಭಾರತಕ್ಕೆ ಹೆಮ್ಮೆಯ ವಿಷಯ. ನಿರ್ಧಾರಕ್ಕಾಗಿ IOC ಗೆ ಧನ್ಯವಾದಗಳು. ಇದು ಒಲಿಂಪಿಕ್ಸ್ ಆಂದೋಲನವನ್ನು ಬಲಪಡಿಸುತ್ತದೆ ಎಂದಿದ್ದಾರೆ.
ಲಾಸ್ ಏಂಜಲೀಸ್ ಒಲಿಂಪಿಕ್ಸ್ 2028 ರ ಕಾರ್ಯಕ್ರಮದಲ್ಲಿ ಕ್ರಿಕೆಟ್ನ T20 ಸ್ವರೂಪವನ್ನು ಅಧಿಕೃತವಾಗಿ ಸೇರಿಸಲು IOC ಇಂದು ನಿರ್ಧರಿಸಿದೆ ಎಂಬುವುದು ಉಲ್ಲೇಖನೀಯ. ಅಂತರಾಷ್ಟ್ರೀಯ ಒಲಿಂಪಿಕ್ ಸಮಿತಿ (ಐಒಸಿ) ಸೋಮವಾರದಂದು ಪುರುಷರ ಮತ್ತು ಮಹಿಳೆಯರ ಸ್ಪರ್ಧೆಗಳನ್ನು ಸೇರಿಸಲು ಮತ ಚಲಾಯಿಸಿದೆ, ಜೊತೆಗೆ ನಾಲ್ಕು ಇತರರನ್ನು LA ಗೇಮ್ಸ್ನ ರೋಸ್ಟರ್ಗೆ ಸೇರಿಸಿದೆ.