ತಿಮ್ಮಪ್ಪನ ಸನ್ನಿಧಿಯಲ್ಲಿ ‘ಜವಾನ್’! – ವೆಂಕಟೇಶ್ವರ ಸ್ವಾಮಿಗೆ ಶರಣು ಬಂದ ಶಾರುಖ್

ತಿರುಪತಿ: ಕಿಂಗ್ ಖಾನ್ ಶಾರುಖ್ ಖಾನ್ ಅಭಿನಯದ ಬಹುನಿರೀಕ್ಷಿತ ಜವಾನ್ ಚಿತ್ರ ಸೆ.07 (ಗುರುವಾರ)ರಂದು ವಿಶ್ವಾದ್ಯಂತ ಬಿಡುಗಡೆಗೊಳ್ಳಲಿದೆ.

ತನ್ನದೇ ಹೋಂ ಬ್ಯಾನರ್ ನಲ್ಲಿ ತಯಾರಾಗಿರುವ, ತಮಿಳಿನ ಖ್ಯಾತ ನಿರ್ದೇಶಕ ಆಟ್ಲಿ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಚಿತ್ರದ ಯಶಸ್ಸಿಗೆ ಇದೀಗ ಶಾರುಖ್ ಟೆಂಪಲ್ ರನ್ ಪ್ರಾರಂಭಿಸಿದ್ದಾರೆ.

ಕೆಲ ದಿನಗಳ ಹಿಂದೆ ವೈಷ್ಣೋದೇವಿ ದೇವಸ್ಥಾನಕ್ಕೆ ಭೇಟಿ ಕೊಟ್ಟಿದ್ದ ಶಾರುಖ್ ಖಾನ್ ಇದೀಗ ತಿರುಪತಿ ತಿಮ್ಮಪ್ಪನ ದರ್ಶನ ಪಡೆದುಕೊಂಡಿದ್ದಾರೆ.

ಶಾರುಖ್ ಖಾನ್ ತನ್ನ ಪುತ್ರಿ ಸುಹಾನಾ ಮತ್ತು ನಟಿ ನಯನ ತಾರಾ ಹಾಗೂ ಆಕೆಯ ಪತಿ ವಿಗ್ನೇಶ್ ಶಿವನ್ ಜೊತೆ ತಿರುಮಲಕ್ಕೆ ಆಗಮಿಸಿ ವೆಂಕಟೇಶ್ವರ ಸ್ವಾಮಿಯ ದರ್ಶನ ಪಡೆದುಕೊಂಡರು.

ಸರತಿ ಸಾಲಿನಲ್ಲಿ ಸಾಗಿ ದೇವರ ದರ್ಶನ ಪಡೆದುಕೊಂಡ ಶಾರುಖ್ ಖಾನ್ ಬಳಿಕ ದರ್ಶನ ಪಡೆದು ಹಿಂತಿರುಗುವ ಸಂದರ್ಭದಲ್ಲಿ ಅಲ್ಲಿದ್ದ ಭಕ್ತಾದಿಗಳತ್ತ ಕೈಬೀಸಿದರು. ಬಳಿಕ ಅಂಗಣಕ್ಕೆ ಬಂದ ಶಾರುಖ್ ಮತ್ತು ಸುಹಾನಾ ಅಲ್ಲಿಂದ ಶೀಘ್ರವಾಗಿ ಹೊರ ಸಾಗಿರುವುದು ವಿಡಿಯೋದಲ್ಲಿ ದಾಖಲಾಗಿದೆ.

ಬಿಳಿ ಕುರ್ತಾ ಮತ್ತು ಪೈಜಾಮ ಧರಿಸಿ ಚಿನ್ನದ ಬಣ್ಣದ ಪಟ್ಟಿ ಇರುವ ಬಿಳಿ ಶಾಲನ್ನು ಹೊದ್ದುಕೊಂಡು ಶುದ್ಧ ಸಾಂಪ್ರದಾಯಿಕ ರೀತಿಯಲ್ಲೇ ಶಾರುಖ್ ತಿರುಪತಿ ತಿಮ್ಮಪ್ಪನ ದರ್ಶನವನ್ನು ಪಡೆದುಕೊಂಡರು. ಅವರ ಪುತ್ರಿ ಸುಹಾನ ಬಿಳಿ ಸಲ್ವಾರ್ ಕಮೀಜ್ ಜೊತೆ ಕಾಣಿಸಿಕೊಂಡರು.

ರೆಡ್ ಚಿಲ್ಲೀಸ್ ಎಂಟರ್ಟೈನ್ಮೆಂಟ್ ಬ್ಯಾನರ್ ನಡಿಯಲ್ಲಿ ಗೌರಿ ಖಾನ್ ನಿರ್ಮಾಣ ಹಾಗೂ ಗೌರವ್ ವರ್ಮಾ ಸಹ ನಿರ್ಮಾಣದಲ್ಲಿ ಮೂಡಿಬಂದಿರುವ ‘ಜವಾನ್’ ಚಿತ್ರವನ್ನು ಆಟ್ಲಿ ನಿರ್ದೇಶನ ಮಾಡಿದ್ದು, ಇದು ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ನಿರ್ಮಾಣಗೊಂಡಿದೆ. ಶಾರುಖ್ ಖಾನ್ ಜೊತೆ ನಯನ ತಾರಾ, ವಿಜಯ ಸೇತುಪತಿ ಮತ್ತು ದೀಪಿಕಾ ಪಡುಕೋಣೆ ಪ್ರಧಾನ ಪಾತ್ರಗಳಲ್ಲಿ ನಟಿಸಿದ್ದಾರೆ.