ಬೆಂಗಳೂರಿನಲ್ಲಿ ಇಸ್ರೋ ವಿಜ್ಞಾನಿಗಳನ್ನು ಪ್ರಧಾನಿ ಭೇಟಿಯಾಗಲು ಡೇಟ್ ಫಿಕ್ಸ್!

ಬೆಂಗಳೂರು: ಇಸ್ರೋ (ISRO) ವಿಜ್ಞಾನಿಗಳೂ ಸೇರಿದಂತೆ ದೇಶಕ್ಕೆ ದೇಶವೇ ಚಂದ್ರಯಾನ-3ರ (Chandrayaan 3) ಸಕ್ಸಸನ್ನು ಸಂಭ್ರಮಿಸುತ್ತಿದ್ದಾರೆ.

ಈ ನಡುವೆ ಬ್ರಿಕ್ಸ್ ಸಮಾವೇಶದ ಹಿನ್ನಲೆಯಲ್ಲಿ ದ.ಆಫ್ರಿಕಾ ಪ್ರವಾಸದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ನಿನ್ನೆ (ಆ.23) ಚಂದ್ರನ ಮೇಲೆ ಇಸ್ರೋದ ‘ವಿಕ್ರಮ್ ಲ್ಯಾಂಡರ್’ನ ಐತಿಹಾಸಿಕ ಸಾಫ್ಟ್ ಲ್ಯಾಂಡಿಂಗ್ ಗೆ ದ.ಆಫ್ರಿಕಾದಿಂದಲೇ ವರ್ಚ್ಯುವಲ್ ಆಗಿ ಭಾಗಿಯಾಗುವ ಮೂಲಕ ಇಸ್ರೋ ವಿಜ್ಞಾನಿಗಳನ್ನು ಅಭಿನಂದಿಸಿದ್ದರು.

ಇದೀಗ ಆ.26 ಶನಿವಾರದಂದು ಪ್ರಧಾನಿ ನರೇಂದ್ರ ಮೋದಿ ಅವರು ಬೆಂಗಳೂರಿನಲ್ಲಿರು ಇಸ್ರೋ ಕೇಂದ್ರ ಕಚೇರಿಗೆ ಭೇಟಿ ನೀಡಲಿದ್ದಾರೆ.

ಶನಿವಾರ (ಆ.26) ಸಾಯಂಕಾಲ 6.00 ಗಂಟೆಗೆ ಪ್ರಧಾನಿ ಮೋದಿ ಅವರ ಇಸ್ರೋ ಭೇಟಿಗೆ ಸಮಯ ನಿಗದಿಯಾಗಿದ್ದು, ತಮ್ಮ ಗ್ರೀಸ್ ಪ್ರವಾಸದಿಂದ ನೇರವಾಗಿ ಪ್ರಧಾನಿ ಮೋದಿ ಬೆಂಗಳೂರಿಗೆ ಬಂದಿಳಿಯಲಿದ್ದಾರೆ.

ಬಳಿಕ ಅಲ್ಲಿಂದ ನೇರವಾಗಿ ಇಸ್ರೋಗೆ ತೆರಳಲಿರುವ ಪ್ರಧಾನಿಯವರು ಅಲ್ಲಿ ದೇಶದ ಹೆಮ್ಮೆಯ ವಿಜ್ಞಾನಿಗಳನ್ನು ಅಭಿನಂದಿಸಲಿದ್ದಾರೆ.

ಬ್ರಿಕ್ಸ್ ಸಮಾವೇಶದಿಂದ ಪ್ರಧಾನಿ ಮೋದಿ ಅವರು ಗ್ರೀಸ್ ದೇಶಕ್ಕೆ ಭೇಟಿ ಕೊಡುವ ಕಾರ್ಯಕ್ರಮವಿದ್ದು ಅಲ್ಲಿಂದ ಅವರು ಸೀದಾ ಬೆಂಗಳೂರಿಗೆ ಆಗಮಿಸುವ ಕಾರ್ಯಕ್ರಮ ಇದೀಗ ನಿಗದಿಯಾಗಿದೆ.

ಚಂದ್ರನ ಮೇಲೆ ಇಸ್ರೋ ಲ್ಯಾಂಡರ್ ವಿಕ್ರಮ್ ಸಾಫ್ಟ್ ಲ್ಯಾಂಡಿಂಗ್ ಯಶಸ್ವಿಯಾಗುತ್ತಿದ್ದಂತೆಯೇ ವರ್ಚ್ಯುವಲ್ ಆಗಿ ಇಸ್ರೋ ವಿಜ್ಞಾನಿಗಳನ್ನುದ್ದೇಶಿಸಿ ಪ್ರಧಾನಿ ಮೋದಿ ಅವರು ದಕ್ಷಿಣ ಆಫ್ರಿಕಾದಿಂದಲೇ ಮಾತನಾಡಿ ಅಭಿನಂದಿಸಿದ್ದರು ಮಾತ್ರವಲ್ಲದೇ ಇಸ್ರೋ ಅಧ್ಯಕ್ಷ ಸೋಮನಾಥ್ ಅವರಿಗೆ ಆ ಬಳಿಕ ಖುದ್ದು ಕರೆ ಮಾಡಿ ಪ್ರಧಾನಿ ಅವರು ಈ ಸಾಧನೆಗೆ ವಿಶೇಷ ಅಭಿನಂದನೆಗಳನ್ನು ಸಲ್ಲಿಸಿದ್ದರು.